KANHI mga monghe nipasangil nga dunay mga “milagro” nga nahitabo sa monasteryo sa Lindugon, Sibonga.
Apan ang milagro di gikan sa milagrusong Birhen kon di mga binuhatan ra usab sa mga monghe.
Gihagit hinuon sa usa ka opisyal sa simbahan ang mga namasangil nga moreklamo sa simbahan ug di iagi sa media kon ang pagsumpo sa kahiwian ang ilang katuyoan.
Si Bro. Paul Cabillon nga niangkong boluntaryong nibiya sa monasteryo nibulgar sa giingong mga hiwi nga binuhatan sa mga monghe nga naglakip sa homosexuality, sodomy, ug pagpangwarta sa interview sa dyAB kagahapon.
Napugos si Bro. Paul sa pagbutyag niini tungod usab sa pagpakauwaw kaniya.
Apan, si Nene Alegado, usa ka deboto sa Birhen ug dakong tigsuporta sa kongregasyon, niingon ngadi siya makatuo sa alegasyon.
Matod niya, ang kontrobersyal nagsugod lang sa mga boluntarya ug naapektohan ang mga monghe.
“In fairness sa mga monghe, nagtinarong na sila..,” dason ni Alegado.
Ning tuiga, napublikar sa Bag-ong Lungsuranon, ang opisyal nga mantalaan sa simbahan sa Sugbo, nga ni-absent without official leave (Awol) si Bro. Paul maong gipahimangnoan ang publiko nga di na siya konektado sa Marian Monks of Eucharistic Adoration aron usab di na makapahigayon og transaksyon dala ang ngalan sa maong monasteryo.
Apan matod niya nga siya maoy nihawa kay di na niya matulon ang sistema monasteryo.
Iyang gisaysay nga samtang bag-o palang siya sa monasteryo, usa ka labaw nga monghe ang nisaka sa iyang lawak ug nipugos sa pakighilawas kaniya o sodomy.
Nisuway sa pagkontra si Bro. Paul kay matod niya sagrado ang ilang dapit apan wa gihapoy nahimo ug nahitabo gyud ang malaw-ay nga binuhatan.
Dugang niya nga di lang siya maoy nabiktima sa sodomy kon di apil na ang ubang mga monghe.
Niadtong Agusto sa miaging tuig, atol sa kasaulogan sa silver jubilee sa monasteryo, giingong nagpahigayon og Miss Gay pagent ang mga monghe sud mismo sa monasteryo diin si Bro. Paul ang nigawas nga second runner-up.
Si Bro. Dodong Torres, laing aspirant pagka-monghe, nipasangil nga maong nihawa siya tungod sa malaw-ay nga binuhatan.
Matod niya nga sagad sa mga “milagro” mahitabo sa comfort room sa higayon nga mangaligo sila.
Sila nipasangil nga si Bro. Martin Mary, ang founder sa monasteryo nasayod niining tanan apan way gihimo aron kini mahunong.
Mismong si Bro. Martin ang gipasanginlan ni Bro. Dodong nga nihimo og di maayong binuhatan kaniya dihang gidala siya niini sa usa ka kapilya di layo sa monasteryo.
Giingong gihalog siya ni Bro. Martin apan giingnan lang nga inamahan ang iyang pagtagad maong di angayang hatagan og malisya.
